இனரீதியான தொந்தரவு என்றால் என்ன?
பின்வரும் அடிப்படைகளை வைத்து உங்களை அறிவதன் மூலம், உங்களை யாராவது இடையூறு செய்தல் அல்லது பயப்படுத்தல் அல்லது உங்களை நியாயமற்ற முறையில் நடத்தல் இனரீதியான தொந்தரவு ஆகும்.
- இனம்
- நிறம்
- பரம்பரை
- பிறப்பிடம்
- இனத்துவத் தொடக்கநிலை
- சமயக் கோட்பாடு
- குடியுரிமை
இனரீதியான தொந்தரவு, மேலேயுள்ள ஏதாவது சிறப்பியல்புகளின் சேர்க்கையை அடிப்படையாகக் கொண்டிருக்கலாம். அவற்றுடன் தொடர்பான விடயங்களான, உங்களுடைய பூர்வீகத்துடன் தொடர்பாக நீங்கள் அணியும் ஆடைகள், அசையழுத்தத்துடன் பேசல், குறிப்பிட்ட சமயத்தைப் பின்பற்றல் போன்றவற்றைப் பொறுத்தும் இது இருக்கலாம்.
அந்த ஏதாவது காரணங்களுக்காக யாராவது உங்களைத் துன்புறுத்தினால் அல்லது அவமதித்தால் அல்லது உங்களை நியாயமற்ற விதத்தில் நடத்தினால் அது சட்டத்துக்கு எதிரானது ஆகும்.
ஒன்ராறியோ மனித உரிமைகள் சட்டவிதிகள் (The Ontario Human Rights Code) உங்களை இனரீதியான தொந்தரவிலிருந்தும் பாகுபாட்டிலிருந்தும் பாதுகாக்கிறது. நீங்கள் வேலைசெய்யும் இடத்தில், வாழுமிடத்தில் அல்லது சேவையைப் பெறுமிடத்தில் உங்களிடைய உரிமைகள் பாதுகாக்கப்பட்டுள்ளன. இந்தச் சேவைகள், உணவகம், கடைகளும் கடைத்தொகுதிகளும், தங்குமிட விடுதிகள், வைத்தியசாலைகள், பொழுதுபோக்கிடங்கள், பாடசாலைகள் போன்றவற்றை உள்ளடக்கும். இந்தச் சட்டவிதி, நீங்கள் ஒரு ஒப்பந்தத்தில் கையொப்பமிடும் போதும், ஒரு தொழிற்சங்கத்தினதோ அல்லது ஒரு வணிக அமைப்பினதோ அல்லது ஒரு தொழில் சார்ந்த அமைப்பினதோ அங்கத்தவராக இருக்கும் போதும் கூட உங்களை பாகுபாட்டிலிருந்தும் துன்புறுத்தலிலிருந்தும் பாதுகாக்கிறது.
யாராவது:
- இனரீதியான அவதூறு அல்லது பகிடிகள் சொல்லும் போது
- உங்களுடைய இன அடையாளம் காரணமாக உங்களை எள்ளி நகையாடும் போது அல்லது அவமதிக்கும் போது
- வேலையிடத்தில் அல்லது பாடசாலையில் அல்லது குடியிருப்புப் பகுதியில் குறிப்பிட்ட இனத்தைச் சார்ந்த ஆட்களைத் தாழ்வாகக் காட்டும் கேலிச் சித்திரங்கள் அல்லது படங்களை ஒட்டும் போது
- உங்களுடைய இனம், நிறம், குடியுரிமை, பிறப்பிடம், இனத்தின் பூர்வீகம் அல்லது சமயக் கோட்பாடு காரணமாக உங்களைப் பெயர் சொல்லி கூப்பிடும் போது
நீங்கள் வேலை செய்யுமிடத்தில் அல்லது வாழுமிடத்தில் அல்லது சேவை ஒன்றைப் பெறுமிடத்தில் இனரீதியான தொந்தரவு நிகழலாம்,
சிலவேளைகளில் இனரீதியான தொந்தரவு, உங்களுடைய இனத்துடன் நேரடியாகத் தொடர்பான சொற்களையோ செயல்களையோ கூட உள்ளடக்குவதில்லை. உங்களுடைய பூர்வீகம் காரணமாக, உங்களை அவமானப்படுத்துவதற்கு யாராவது உங்களை நியாயமற்ற முறையில் தனிமைப்படுத்தலாகவும் இது இருக்கலாம்.
ஒரு நச்சூட்டப்பட்ட சூழல் (A poisoned environment)
நீங்கள் வாழும் அல்லது வேலை செய்யும் அல்லது சேவைகளைப் பெறும் இடங்களில், இனத் தொந்தரவு ஒரு கூடாத தாக்கத்தை ஏற்படுத்தலாம் அல்லது அதை நஞ்சூட்டலாம். தொந்தரவு உங்களை நோக்கி இருக்காவிட்டாலும் கூட உங்களுடையதும் மற்றவர்களுடையதுமான சூழலை நஞ்சூட்டலாம். இது சேர்ந்து வாழ்தலையும் வேலைசெய்தலையும் மிகக் கடினமாக்கலாம்.
சூழல் நஞ்சூட்டப்பட்டிருந்தால், அது உங்களுக்கு எப்படித் தெரியும்? அதைப் பார்ப்பதற்கான ஒரு வழி, எதிர்மறையான செயல்களையும் கருத்துரைகளையும் பார்ப்பதாகும். உதாரணத்துக்கு, குறிப்பிட்ட இனத்துவ அவதூறுகள், செயல்கள், அல்லது பகிடிகள் உங்களை அல்லது மற்றவர்களை வேலையிடத்தில் அசெளகரியப்படுத்தினால் அல்லது வேலைக்குச் செல்வதற்கு பயத்தை ஏற்படுத்தினால், அது அந்த வேலைச் சூழல் நஞ்சூட்டப்பட்டிருப்பதைக் காட்டலாம்.
நான் என்ன செய்யலாம்?
உங்களுக்கு தொந்தரவு செய்பவர் பின்வருவோர்களாக இருக்கலாம்:
- உங்களுடைய மேலதிகாரி அல்லது உங்களுடன் கூட வேலைசெய்பவர்
- தூய்மையாக்குபவர், கட்டிட நிர்வாகி, அல்லது கட்டிடச் சொந்தக்காரர்
- உங்களுடைய ஆசிரியர்
- உங்களுடைய கட்டிடத்தில் வசிப்பவர்
நீங்கள் தொந்தரவுக்கு உட்படுவதாக, நீங்கள் நினைத்தால், அந்த ஆளை நிறுத்தச் சொல்வதற்கு நீங்கள் முயற்சிக்கலாம். ஏதாவது சொல்வதோ அல்லது செய்வதோ உங்களை அல்லது உங்களுடைய தொழிலை அல்லது குடியிருப்பை அபாயத்தில் போடலாம் என நீங்கள் உணரலாம். அப்படியான நிலைமையானால் அதிகாரத்தில் உள்ள வேறு யாரிடமாவது நீங்கள் செல்லுங்கள்.
வேலையில் இது நிகழ்ந்தால், நீங்கள் மனித வளத்துடன் பேசலாம் அல்லது மேலதிகாரிக்கு சொல்லலாம் அல்லது உங்களுடைய தொழிற்சங்கப் பிரதிநிதியைத் தொடர்பு கொள்ளலாம். உங்களுடைய கட்டிடத்தில் நிகழ்ந்தால் உங்களுக்கு வாடகைக்கு விட்டவருக்கு அறிவிக்கலாம்
இந்தத் தெரிவுகளில் எதுவும் உங்களுடைய நிலைமையை முன்னேற்ற உதவாவிட்டால் அல்லது இந்தப் படிமுறைகளை எடுக்க உங்களுக்கு பயமாக இருந்தால், ஒன்ராறியோ மனித உரிமைகள் இணக்கமன்றில் (Human Rights Tribunal of Ontario) மனு எனப்படும் ஒரு முறையான மனித உரிமைகள் முறையீடுத் தாக்கலும் நீங்கள் செய்யலாம்.
இதைத் தடுப்பதற்கு நான் பொறுப்பா?
நீங்கள் தொந்தரவுக்குள்ளாவது, அதிகாரத்தில் உள்ள யாராவது ஒருவருக்கு தெரிவதை நிச்சயப்படுத்துவதற்கான படிமுறைகளை நீங்கள் எடுக்க வேண்டியிருக்கலாம், ஆனால் அதை நிறுத்துவதற்கு நீங்கள் பொறுப்பானவர் அல்ல.
ஒன்ராறியோவில் வேலை வழங்குவோர், ஒப்பந்தக்காரர், தொழில் வல்லுனர் அமைப்புக்கள், தொழிற்சங்கங்கள், வாடகைக் குடியிருப்பு வசதியும் மற்றைய சேவைகளும் வழங்கும் மக்கள் போன்றோர் தங்களுடைய உடமைகளில் அல்லது தங்களுடைய வேலையிடங்களில் அல்லது தங்களுடைய வளங்களில் இனத்தொந்தரவு நிகழாமல் இருப்பதை கட்டாயமாக உறுதி செய்துகொள்ள வேண்டும். தொந்தரவு பற்றிய முறைப்பாடுகளை அவர்கள் அலட்சியம் செய்யமுடியாது அத்துடன் அவர்களுடைய சூழல் பாதுகாப்பாகவும் செளகரியமாகவும் இருப்பதை உறுதி செய்யத் தேவையான படிமுறைகளை கட்டாயமாக எடுக்க வேண்டும்.
இனத் தொந்தரவு வன்முறைக்கு வழிவகுக்கலாம்
பொதுவாக, மெளனம் இனத்தொந்தரவு இல்லாமல் போக வழி செய்யமாட்டாது, அத்துடன் எதுவும் செய்யாவிட்டால் அது பலவேளைகளில் மிகவும் பாரதூரமானதாகி விடும். நீங்கள் அசெளகரியத்தை உணர்ந்தால் அல்லது மிரட்டப்பட்டால் அதைப்பற்றி அதிகாரத்தில் உள்ள ஒருவருடன் ( ஒரு மேற்பார்வையாளர், கடைச் சொந்தக்காரர் போன்றோர்) கதையுங்கள்.
தொந்தரவு தரும் நடத்தை, அபாயத்தில் இருப்பதாக உங்களை உணரப் பண்ணினால் அல்லது வன்முறைக்கு வழி வகுத்தால் காவல்துறையினரை உடனடியாக அழையுங்கள்.
பழிவாங்கல் சட்டத்துக்கு எதிரானதாகும்
சட்ட விதிகள், உங்களைப் பழிவாங்கலில் (அல்லது தண்டனை) இருந்தும் பாதுகாக்கிறது. இதன் கருத்து என்னவென்றால் ஒழுங்காட்சியோ (அல்லது அது பற்றிய பயப்படுதலோ) அல்லது எந்தவித எதிர்மறையான நடத்துகையோ இல்லாமல், இனப்பாகுபாடு பற்றியோ அல்லது இனத் தொந்தரவு பற்றியோ நீங்கள் பிரச்சனைகளை எழுப்பவோ அல்லது முறையிடவோ உங்களுக்கு உரிமை உண்டு. உங்களுடைய வேலையிடத்திலோ அல்லது உங்களுடைய குடியிருப்பிலோ அல்லது சேவைகளிலோ, தொந்தரவு அல்லது பாகுபாடு பற்றி நீங்கள் வெளிப்படையாக பேசினாலும், ஒன்ராறியோ மனித உரிமைகள் இணக்கமன்றில் (Human Rights Tribunal of Ontario) மனுத் தாக்குதல் செய்வது போன்ற ஒரு முறையான முறையீடு செய்யும் போதும் இந்தப் பாதுகாப்பு செல்லுபடியாகும்.
மேலும் தகவல்களுக்கு
ஒன்ராறியோ மனித உரிமைகள் ஆணைக்குழுவின் (The Ontario Human Rights Commission), இனவாதமும் இனப் பாகுபாடும் பற்றிய கொள்கை, போன்ற ஏனைய வெளியீடுகள் www.ohrc.on.ca என்ற இணையத்தளத்தில் கிடைக்கும்.
மனித உரிமைகள் பற்றிய முறையீடு செய்ய – மனுப் போட – ஒன்ராறியோவின் மனித உரிமைகள் இணக்கமன்றைத் (Human Rights Tribunal of Ontario) தொடர்பு கொள்ள –
கட்டணமற்ற தொலைபேசி (Toll Free): 1-866-598-0322
செவிப்புலனற்றோருக்கான கட்டணமற்ற தொலைபேசி (TTY Toll Free):
1-866-607-1240
இணையத்தளம் (Website): www.hrto.ca
உங்களுக்கு சட்ட உதவி தேவையாயின் மனித உரிமைகள் சட்ட ஆதார நிலையத்தை (Human Rights Legal Support Centre) தொடர்பு கொள்ள:
கட்டணமற்ற தொலைபேசி (Toll Free): 1-866-625-5179
செவிப்புலனற்றோருக்கான கட்டணமற்ற தொலைபேசி (TTY Toll Free):
1-866-612-8627
இணையத்தளம் (Website): www.hrlsc.on.ca